Elman Tovuzun yeni "Sən məni yuxuda çağır bir axşam" adlı kitabının təqdimatı
Şəhriyar Ədəbi Mədəni cəmiyyəti tərəfindən Bakıda yaşayan sevimli şairimiz Elman Tovuzun yeni "Sən məni yuxuda çağır bir axşam" adlı kitabının təqdimatı keçirildi.
Kitabın redaktoru Şəhriyar cəmiyyətinin üzvü şairə Afaq Şıxlı, ön söz müəllifi şair Məmməd İsmayıldır.
Elman Tovuz - 10 aprel 1961-ci ildə Tovuz rayonunda anadan olmuşdur. AzXTİ-nin ümumiqtisad fakültəsini, və İctimai peşələr fakültəsinin jurnalistika şöbəsini bitirib.
"Hara gedir bu yol belə?" (2008), "Dünya, məni mənə qaytar!" (2009), "Dəlir ürəyimi demədiklərim" (2010) kitablarının müəllifidir.
"Sən məni yuxuda çağır bir axşam" müəllifin oxucularla dördüncü görüşüdür. Bu kitabda Elman bəyin uzaq gənclik illərindən ta bu günədək, necə deyərlər, tumurcuğdan yarpaq tökümünədək olan dövr ərzində yazdığı "vüsal" pıçıltılı, "həsrət" haraylı sevgi şeirləri toplanmışdır.
Sazlı-sözlü bu məclisdə kitab və onun müəllifi haqqında çıxışlar oldu, şairin şeirləri oxundu. Qələm dostları və yoldaşları səmimi və kövrək şeirlər müəllifi Elman Tovuza can sağlığı, bol-bol ilham və yeni yaradıcılıq uğurları arzuladılar.
P.S. “Bütün dünyanı gəzib dolaşmaq, amma onun gözəlliklərini görməmək, sevməmək və dərk etməmək olar. Bir otağın pəncərəsindən isə bütün dünyanı seyr edib ona məftun olmaq, hətta soyuq qəlbləri belə isidəcək əsərlər yazmaq mümkündür.. Elman Tovuz öz böyük ürəyi və dünyaya baxışı ilə Vətəndən çox-çox uzaqlarda yaşayan həmvətənlərinin də ürəyinə sevgi və dostluq şəfəqlərini paylaya bilən insanlardandır”.
Afaq Şıxlı.
- Yorum yapmak için giriş yapın